Eduki nagusira joa

Nabigazio-menura joan

Inscripción Abierta 2021
Premio Peña Ganchegui

Nabigazio-menura joan

Oinarriak

Peña Ganchegui Artxiboak, Eusko Jaurlaritzako Etxebizitza eta Arkitektura Zuzendaritzarekin elkarlanean, Euskal Arkitektura Gaztearen PEÑA GANCHEGUI SARIA iragartzen du, banaka nahiz taldeka, beren eginkizun profesionala Euskal Herriko Autonomia Erkidegoan garatzen duten edota gaitzen dituen titulua bertan eskuratu duten arkitektoei zuzentzen zaiena.

Saria bi urtez behin emango da, eta Luis Peña Ganchegui arkitektoarengandik hartu du izena (Oñati 1926 - Donostia 2009), hura baita XX. mendeko bigarren erdiko Euskal Arkitekturaren erreferenterik garrantzizkoena.

1. Helburuak

Sari hau arkitektura-ibilbide gazte baten balioa aitortzeko asmoaz ematen da, eta aldi berean proiekzio zabaleko karrera hasi berri bat nahi da bultzatu, ikusgaitasuna emanez, praktika profesional ereduzkoa izateaz gainera, kultura arkitektonikoa bultzatzen, garatzen eta sendotzen laguntzen duten ekarpenei.

Saria ez zaio emango, beraz, obra edo lan jakin bati, hainbat eratakoa izan daitekeen lan-multzo bati baizik: arkitekto batek edo zenbait arkitektok gidaturiko arkitekto baten edo talde baten ibilbide nabarmentzen hasia saritzen du lehiaketa honek, gaitasuna ematen duen titulua eskuratu ondorengo lehen 10 urteen baitan.

2. Hartzaileak

Arkitekto guztiak aurkeztu ahal izango dira sari honetara, edota arkitektoek gidaturiko ekipo guztiak, baldin egiaztatzen badute, baldintza geografikoa betetzeaz gainera (Euskal Herriko Autonomia Erkidegoan izatea jardueraren egoitza edo bertan arkitekto gisa trebatuta egotea), 2013ko maiatzaren 16aren ondoren eskuratua dela gaitzen dituen titulua. Taldeak direnean, taldeko arkitekto kide guztiek bete beharko dute baldintza hori.

Ezingo dute Peña Ganchegui sariketan parte hartu familiaren eta lanaren aldetik Epaimahaiko kideekin loturarik duten arkitektoek, ezta aurreko edizioren batean sari hau eskuratu dutenek ere.

Hautagaiek berek aurkeztuko dute beren hautagaitza, beren merituen berri emanez, zeinen artean egon baitaitezkeen obrak, proiektuak eta ikerlanak, beti ere arkitekturaren alorrari ekarpen bat egiten badiote, esparru eta eskala guztietan, hasi objektuen diseinutik eta lurraldeko interbentzioetara arte.

3. Hautaketa-irizpideak

Epaimahaia beregaina da lanak epaitu ahal izateko egokitzat jotzen dituen prozedurak ezartzeko, ahalmen profesionaleko, originaltasunezko, berrikuntzazko, koherentziazko irizpideak balioesteko xedeaz, baita epaimahaiak bere iritziz baliatzea erabakitzen dituen beste irizpide batzuk ezartzeko ere.

4. Epaimahaia

5 kidek osatuko dute epaimahaia, eta haien artean egongo dira, hitzarekin baina botorik gabe, Eusko Jaurlaritzako Ingurumen, Lurralde eta Etxebizitza Saileko ordezkari bat eta Peña Ganchegui Artxiboko ordezkari bat, eta kanpoko beste hiru kide erantsiko zaizkie haiei, zeinetarik bi gutxienez arkitektoak izango baitira. Idazkari bat ere izango da, hitzik eta botorik gabe, Peña Ganchegui Artxiboak izendatua.

Peña Ganchegui Sariaren Laugarren Edizioaren Epaimahaiak kanpoko bost kide izango ditu, honako hauek:

María Langarita (Zaragoza, 1979). 2003an Nafarroako Unibertsitateko Arkitektura Eskolan bukatu zituen ikasketak eta 2016tik doktore da ETSAMen eskutik, non 2013az geroztik irakasle den. 2005ean, Victor Navarrorekin, Langarita - Navarro estudioa zabaldu zuen. Nazioko zein nazioarteko hainbat erakusketetan hautatu eta erakutsiak izan dira, hitzaldi eta tailer ugari emateko gonbidatuak izateaz gain, era askotariko sariak jasoz.

Fernando Márquez (Madril, 1957). 1980tik ETSAMeko arkitektoa. 1982an Richard Levenerekin batera El Croquis arkitektura estudio eta editoriala sortu zuen. Ordutik, izen bereko aldizkaria editatu eta zuzentzen dute. Gaur egun 200 ale baino gehiago argitaratu dituzte, baita Arkitekturako Liburutegia teoria eta saiakera liburuen bilduma ere. Horrez gain, 1999az geroztik, El Escorialeko El Croquis.

Antonio Ortiz (Sevilla,1947). 1974an bukatu zituen Madrilgo Arkitektura Eskolan ikasketak, 1968an Rafael Moneoren estudioan lan egin ondoren; 1971etik Antonio Cruzekin batera jardun da. Irakasle gonbidatua izan da Zurich, Laussanne, Iruña, Cornell, Columbia, Harvard (Kenzo Tange Katedra lortu zuen bertan), Delft eta Genevako unibertsitatetan. 2004tik Sevillako Unibertsitateko ohorezko irakaslea da eta Arkitektura Eskolako Katedra Zurian dihardu. Cruz y Ortizen lanak sari ugari jaso ditu, eta argitalpen eta erakusketa askotan zabaldu da.

5. Saria

Epaimahaiak 10 finalista hautatuko ditu gehienera, eta haien artean hautaketa eginez esleituko da saria, bakarra, 6000 €koa. Aukeratzen diren hautagaitzei sinestamendu bat emango zaie, Peña Ganchegui Sariko Finalistak izan direla adieraziz; saritutako arkitektoaren edo taldearen kasuan, sinestamendu horrek formatu berezia izango du.

6. Zabalkundea

Sariak bere zabalkunde-plataforma propioak izango ditu, eta ondorengo url honetan eskura daitezke: premio.ganchegui.com. Hantxe argitaratuko da Peña Ganchegui Sariarekin loturiko informazio oro, bai deialdiaren fasean, bai erabakia hartu ondoren, eta hantxe jakinaraziko da orobat sariketaren emaitza eta emango da saritutako lanen berri. Lan horiek, bestalde, erakusketa batean eta/edo argitalpen baten bidez zabal ahal izango dira.

7. Izen ematea

Sariketara aurkeztu ahal izateko, uztailaren 7a baino lehenago eman behar dute izena hautagaiek. Horretarako, 20 € ordaindu beharko dute “La Caixa”ko ES50 2100 5092 11 0200067386 kontu-zenbakian, azalpen gisa “Premio Peña Ganchegui Saria” ipiniz, eta hautagaiaren edo taldearen izena adieraziz (dagokiona), sariketaren weborrian helburu horretarako dagoen online inprimakia betetzeaz gainera (http://premio.ganchegui.com). Honako informazio hau eskatzen da: hautagaiaren edo hautagaien izen-abizenak; tituluaren data; tituluaren lekua; lanaren lekua; harremanetarako helbidea, telefonoa eta e-posta. Aldi honetan, izen ematearen kuota ordaindu dutelako egiaztagiria aurkeztu beharko dute hautagaiek, modu telematikoan.

Hautagaitzak 2023/09/07 baino lehen aurkeztu beharko dira, sariaren weborriko online aplikazioaren bitartez, eta PDF artxibo bat edo gehiago izango dira, haien artean:

– Aurkezpen-memoria bat, DinA4 bertikal formatuan, epaimahaiak balioesteko aurkezten den ibilbidearen berri ematez. Memoriaren luzera, gehienera, 500 hitzekoa izango da.

– 6 orri gehienera, DinA3 horizontal formatuan, eduki eta konposizio librekoak, Peña Ganchegui Sarian parte hartzen duen ibilbidea azaltzen duen material grafikoak eta/edo idatziak osatuak.

– Peña Ganchegui Sarian parte hartzeko beharrezkoak diren baldintzak betetzen direla egiaztatzen duen dokumentazioa.

8. Oinarrien onarpena

Peña Ganchegui Sariketara aurkezteak esan nahi du hautagaiek ontzat ematen dituztela sariketaren oinarri guztiak, eta orobat esan nahi du beren adostasuna ematen dutela sariketaren antolatzaileek erabil dezaten aurkezturiko dokumentazioa osatzen duen material guztia, egokitzat jotzen diren erakusketak eta/edo argitalpenak egiteko xedeaz.

Oinarri hauen interpretazioari buruzko ezein zalantza sortuko balitz, epaimahaiak ebatziko du, eta haren erabakia apelaezina izango da.

9. Egutegia

2023/05/16: 2023ko Peña Ganchegui Sariaren deialdia

2023/07/07: Izen ematea formalizatzeko epemuga

2023/09/07: Hautagaitzak emateko epemuga

2023/10/16: Saria erabaki eta emateko ekitaldia

10. Kontsultak

Deialdiari buruzko kontsultak e-posta helbide honetara bidal daitezke: premio@ganchegui.com